Nedeleg Gwechall:

Du-mañ de Nedeleg

Ne oa ket a straejoù

Karget a c'houlou

Nag a stalioù

Leun a vadigoù.

Du-mañ da Nedeleg

Mamm-Gozh a rae krampouezh

Ha kouignoù rouantelezh

Evit debriñ da askoan

Da heul ar sistr bero

Bodet e-tal an tan.

Rak kef-Nedeleg en oaled

'Doug an noz a zeve

Da dommañ ar c'halonoù.

Hag ar paour a dremene

En ur ganañ kantikoù.

Du-mañ da Nedeleg

E veze roet

D'ar vugale sentus

Un aval-orañjez

Ha war baper dantelezh

Ur mabig Jezuz

Dousoc'h eget ar mel sunet.

Goude Tintin Mon

A gonte istorioù

A-wechoù skrijus

Aliez farsus.

Ha Tad-Kozh

Hon lakae da c'hoarzhin.

Du-mañ da Nedeleg

Ne oa ket a straejoù

Karget a c'houlou

Nag a stalioù

Leun a brofoù.

Barzhoneg skrivet gant Naig Rozmor